Yeniyetmə taekvondoçular dünya birinciliyində daha bir medal qazanıb.

30.07.2022

Azərbaycan yığması Bolqarıstanın paytaxtı Sofiyada keçirilən yeniyetmə taekvondoçular arasında dünya birinciliyində daha bir medal qazanıb. Mundialın üçüncü günündə millinin üzvü Fuad Məhərləmli bürünc mükafata sahib olub.
45 kq çəki dərəcəsində mübarizə aparan idmançı mübarizəyə 1/32 finaldan başlayıb. O, ardıcıl olaraq Əhməd Əl-Rababaanı (İordaniya) və Karlo Olyeviçi (Xorvatiya) 2:0 hesabı ilə məğlub edərək 1/8 finala yüksəlib. Məhərləmli növbəti mərhələyə döyüş keçirmədən vəsiqə qazanıb. Buna Çin Taypeyindən olan Vey-Juan Vanqın döyüşə çıxmaması səbəb olub. Təmsilçimiz 1/4 finalda qazaxıstanlı Beket Bolatulini sınağa çəkib. Gərgin keçən görüşdən Məhərrəmli qalib ayrılıb - 2:1.
O, 1/2 finalda Minqyu Kimlə (Cənubi Koreya) üz-üzə gəlib və bu dəfə dayanqdan rəqib üstün ayrılıb. Nəticədə Fuad Məhərrəmli dünya birinciliyini üçüncü yerdə başa vurub.
Bu, Azərbaycan yığmasının mundialda qazandığı ikinci medal olub. Məhərləmlidən öncə Mehdi Budaqlı (33 kq) dünya çempionu tituluna yiyələnib.
Qeyd edək ki, yarışa iyulun 31-də yekun vurulacaq.